Scena XII
Gelsomina e detti.
Gelsomina – (che avrà intese le ultime parole) Ah! Viecchio veziuso, te voglio dà io 'o palummo e 'a tortorella.
Giacinto – Muglierema! Aggio passato 'o guajo!
Gelsomina – Me faccio maraviglia 'e sta faccia tosta che se va acchiappanno 'e marite 'e ll'ate.
Ninetta – Ah! pettegola insolente! hai il coraggio di dirmi questo? E po', tu a me?
Gelsomina – Seh, t' 'o dico... pecché avisse che me risponnere?
Ninetta – Doppo tutte chello che io tengo ncuorpo e me sto zitta, vuoi aggiungere l'imprudenza 'e truvarte tu ccà ncoppa?
Gelsomina – No, io tengo ncuorpe quacche cosa d' 'o tujo e m'aggia levà na preta 'a dint' 'a scarpa.
Ninetta – Ah! te vuó levà na preta? Baró, vuje 'a sentite o no?
Giacinto – Che nce pozzo fà io c' 'a preta.
Gelsomina – Siente pagliè, quanno te ncoccio t'aggia scippà sti quatte zirole che tiene ncapo.
Ninetta – Ah! grandissima lazzarone, con chi ti credi di parlare?
Gelsomina – Comme, a me chiamme lazzarona?
Francesco Gabriello Starace
Fonte: F. G. Starace, L'avvocato Ninetta, Gennarelli, Napoli 1921.