Scena XIII
Giulio, Cesarino, Bettina e detti.
Giulio – Che cosa è questo chiasso?
Cesarino – È succieso 'o fatto.
Ninetta – È la signora Baronessa che ha preso gelosia del marito.
Giulio – Ma Gelsomina finiscila, non è questo il luogo di far delle lazzarate.
Gelsomina – Se n'è venuto isso, chist'auto spito sicco. Levateve 'a nanze ca le voglio scippà 'a faccia a chella ciucciuvettela.
Bettina – Neh guè, neh guè? Tu cu chill'haje grandissima ciantella. Tu 'o saje ca parle cu figliema che tene tanta na laura.
Gelsomina – Ebbiva essa! Se n'è asciuta chest'ata cuccuvaja c' 'o lavere e 'o fecatiello.
Bettina – Uh! cuccuvaja... a me cuccuvaja!... Ah! vajassona impertinente, te faccio stà a duvere.
Ninetta – Mammà, tu scendi troppo basso a venire a competenza cu na stiratrice che porta 'o rasulo ammanecato (guardando Cesarino) dint' 'a sacca.
Cesarino – Uh! malora chesta ha ntiso tutte cose!
Giacinto – Comme, muglierema porta 'o rasule?
Gelsomina – Sicuramente, pecché nc'avite che dicere? Avite ragione che facite 'e guappe ccà ncoppa, ma si scennite abbascio...
Giulio – Baró, Baró... purtatevella... si no ccà fernesce male...
Giacinto – Gesummì, jammuncenne... jammoncenne...
Francesco Gabriello Starace
Fonte: F. G. Starace, L'avvocato Ninetta, Gennarelli, Napoli 1921.